Dokumentari “UDHA” bashkon diasporën shqiptare në Romë

Romë, 18 shtator 2025 – Në ambientet e Casa del Cinema, në Villa Borghese, kryeqyteti italian do të mirëpresë premierën e dokumentarit “UDHA”, me regji të Alessandro Ferrantellit. Ngjarja do të zhvillohet më 18 shtator, duke filluar nga ora 20:30, dhe pritet të shndërrohet në një mbrëmje të veçantë për kulturën dhe identitetin shqiptar.

Dokumentari mbart moton “Një gjak, një gjuhë, një besë” dhe vjen si një udhëtim i thellë kulturor e identitar, duke rikthyer në vëmendje trashëgiminë, historinë dhe rrugëtimin e shqiptarëve nëpër kohë.

Në prezantim do të marrin pjesë protagonistët kryesorë të filmit: Lorik Cana, ish-kapiteni i Kombëtares shqiptare, si dhe Arbër Agalliu, profesor dhe studiues, të cilët sjellin dimensione të ndryshme të përvojës dhe identitetit shqiptar. Krahas tyre, i pranishëm do të jetë edhe vetë regjisori Ferrantelli, i cili do të ndajë me publikun qasjen e tij artistike dhe arsyet pse vendosi të ngjizë këtë projekt.

Aktiviteti organizohet nga Illyrian Brains Roma në bashkëpunim me Ambasadën e Republikës së Kosovës në Romë, duke u shndërruar kështu në një urë lidhëse mes diasporës shqiptare dhe miqve të saj në Itali.

“UDHA” nuk është vetëm një dokumentar artistik, por edhe një ftesë për reflektim mbi identitetin kolektiv, duke i dhënë zë rrëfimeve që tejkalojnë kufijtë gjeografikë dhe kohorë. Për shqiptarët në diasporë dhe për miqtë e kulturës shqiptare në Romë, kjo premierë pritet të jetë një moment i rëndësishëm për të forcuar lidhjet dhe për të festuar rrugëtimin e përbashkët kulturor.