Deep Purple publikojnë albumin e ri “SPLAT!” – një rikthim i fuqishëm në hard rock

Banda legjendare britanike Deep Purple ka publikuar sot albumin e saj më të ri në studio të titulluar “SPLAT!”, një projekt i 24-ti në karrierën e tyre, i cili tashmë është i disponueshëm në tregun botëror.

Albumi vjen pas tre singlave që kanë tërhequr vëmendje ndërkombëtare – “Arrogant Boy”, “Diablo” dhe “Guilt Trippin’” – dhe eksploron një koncept të pazakontë: fundin e njerëzimit jo si shkatërrim, por si transformim dhe kalim në një gjendje tjetër ekzistence. Projekti është realizuar në bashkëpunim me producentin e njohur Bob Ezrin.

Frontmeni Ian Gillan ka thënë se albumi rikthen energjinë dhe stilin klasik të grupit, duke u afruar me frymën e krijimeve të tyre më ikonike të viteve ’69–’73. Sipas tij, “SPLAT!” përfaqëson një rikthim te dinamika, balanca dhe energjia që e kanë bërë grupin një nga emrat më me ndikim në historinë e rock-ut.

Sot, anëtarët e grupit janë në mosha të avancuara: Gillan dhe Roger Glover janë 80-vjeçarë, Ian Paice dhe Don Airey janë 78 vjeç, ndërsa kitaristi Simon McBride është 47 vjeç, duke sjellë një kombinim mes përvojës së gjatë dhe energjisë më të re muzikore.