Mira Murati firmos marrëveshje miliardëshe me Nvidia: Startup-i i saj hyn fuqishëm në garën globale të AI
Mira Murati, ish-drejtoresha kryesore e teknologjisë në OpenAI, po e shtyn përpara ambicien e saj të re në botën e inteligjencës artificiale. Startup-i i saj me seli në San Francisko, Thinking Machines, ka arritur një marrëveshje shumëvjeçare me gjigantin e çipave Nvidia për furnizim me çipa të avancuar, një partneritet që vlerësohet në dhjetëra miliarda dollarë.
Sipas marrëveshjes, kompania e Muratit planifikon të përdorë të paktën një gigavat të çipave të gjeneratës së ardhshme Vera Rubin të Nvidia-s për qendra të mëdha të të dhënave të inteligjencës artificiale. Vetë Nvidia ka bërë edhe një investim të ri në startup, pasi më parë kishte marrë pjesë në raundin fillestar prej 2 miliardë dollarësh që e vlerësoi kompaninë rreth 10 miliardë dollarë.
Në qendër të projektit është platforma Tinker, një mjet që u mundëson kompanive të përshtasin modele të mëdha gjuhësore për nevojat e tyre të biznesit pa pasur nevojë të ndërtojnë vetë infrastruktura të kushtueshme të AI. Murati thotë se teknologjia e Nvidia-s është baza mbi të cilën është ndërtuar gjithë fusha e inteligjencës artificiale dhe se ky partneritet do ta përshpejtojë zhvillimin e mjeteve të reja për bizneset.
Megjithatë, marrëveshja vjen edhe në një moment sfidash për startup-in e ri. Gjatë muajve të fundit disa bashkëthemelues dhe studiues janë larguar nga kompania, ndërsa gara globale për inteligjencën artificiale po bëhet gjithnjë e më intensive. Për Muratin, kjo marrëveshje duket të jetë një hap i madh për ta pozicionuar Thinking Machines mes lojtarëve kryesorë të industrisë së AI.
