Dy testamente sekrete të Giorgio Armanit: Misteri që përcakton të ardhmen e perandorisë së modës

Në një zyrë noteriale në Milano, më 9 shtator, u hapën dy zarfe të vulosura. Brenda tyre, dy testamente të shkruara me dorë nga Giorgio Armani.

Legjenda e modës italiane, që ndërroi jetë më 4 shtator në moshën 91-vjeçare, kishte menduar gjithçka deri në detaj. Nga pasuria prej mbi 11 miliardë eurosh, deri te fati i kompanisë Giorgio Armani SpA, që e themeloi në Piacenza 50 vjet më parë.

Testamenti i parë mban datën 15 mars 2025. I dyti, vetëm tre javë më vonë – 5 prill. Dy dokumente që do të përcaktojnë jo vetëm ndarjen e pasurisë, por edhe të ardhmen e një prej markave më prestigjioze të modës në botë.

Armani nuk kishte fëmijë. Kjo e lejoi atë të caktonte lirisht trashëgimtarët: motrën Rosanna, nipin Andrea, mbesat Silvana e Roberta, si dhe njerëzit e tij më të afërt në punë, si Leo Dell’Orco – krahu i tij i djathtë për dekada.

Por më e rëndësishmja: ai kishte menduar për kompaninë. Në testament, Armani kërkon që marka të mbetet e pavarur, selia të mos largohet nga Italia dhe aksionet të mos listohen në bursë për të paktën pesë vitet e para. Një pjesë qendrore e kontrollit, sipas gjasave, i është lënë Fondacionit Armani, që ai vetë e krijoi mbi një dekadë më parë.

Pasuria përfshin vila luksoze në destinacione nga Saint-Tropez në Antigua, jahte, vepra arti, aksione në kompani gjigante si EssilorLuxottica dhe, mbi të gjitha, 99.9% të aksioneve të Giorgio Armani SpA.

Tani Milano përgatitet për Javën e Modës, e para pa praninë e tij. Një javë që do të mbahet në nder të njeriut që e bëri qytetin simbol të elegancës botërore.
“Trashëgimia e tij është e paçmueshme,” deklaroi Carlo Capasa, presidenti i Dhomës Italiane të Modës.

Në Famedio, mes emrave që e bënë Milanon të madhe, do të gdhendet përgjithmonë edhe një tjetër: Giorgio Armani.