FIFA prezanton rregulla të reja për Kupën e Botës 2026
FIFA ka prezantuar një seri rregullash të reja që do të zbatohen në Kupën e Botës 2026, me synimin që ndeshjet të jenë më dinamike dhe më të rrjedhshme për tifozët në mbarë botën.
Sipas drejtuesve të organizmit më të madh të futbollit në botë, ndryshimet synojnë të reduktojnë humbjen e kohës gjatë lojës dhe të mbajnë ritmin e ndeshjeve sa më të shpejtë. Ideja kryesore është që aksioni në fushë të mos ndërpritet shpesh dhe loja të vazhdojë me intensitet më të madh.
Rregullat e reja fokusohen kryesisht në rifillimin më të shpejtë të lojës, në krijimin e më shumë drejtësie në vendimet e gjyqtarëve dhe në qartësi më të madhe në momentet kyçe të ndeshjes. Kjo pritet të ndihmojë gjyqtarët të marrin vendime më të qarta dhe të shmangin situatat që krijojnë konfuzion në fushë.
Disa nga rregullat kryesore që pritet të zbatohen janë:
1. Kufizim më i rreptë për portierët
Portierët nuk do të mund ta mbajnë topin në duar për më shumë se 8 sekonda. Nëse e tejkalojnë këtë kohë, skuadra kundërshtare mund të fitojë goditje këndi.
2. Ndëshkime më të forta për humbjen e kohës
Gjyqtarët do të kenë udhëzime më të qarta për të ndëshkuar lojtarët që vonojnë rifillimin e lojës gjatë goditjeve të lira, rivënieve nga auti apo zëvendësimeve.
3. Komunikim më i qartë për vendimet e VAR
Në disa raste, gjyqtari mund të shpjegojë publikisht vendimin pas rishikimit në VAR, në mënyrë që tifozët në stadium dhe në televizion ta kuptojnë më mirë vendimin.
4. Procedura më të shpejta për rifillimin e lojës
Topi duhet të rikthehet në lojë më shpejt në situata si autet, goditjet e këndit dhe goditjet e lira, për të shmangur ndërprerjet e gjata.
5. Më shumë kontroll mbi zëvendësimet
Zëvendësimet do të bëhen në mënyrë më të organizuar për të mos ndalur ritmin e ndeshjes dhe për të reduktuar vonesat taktike.
Me këto masa, FIFA synon që Botërori 2026 të ketë ndeshje më të shpejta, më të pastra dhe më të drejtë, duke e bërë spektaklin e futbollit edhe më tërheqës për tifozët
