Trump kërkon 1 miliard dollarë dëmshpërblim nga Harvard, pas përplasjes mbi financimin federal

Donald Trump njoftoi se do të kërkojë 1 miliard dollarë dëmshpërblim nga Universiteti i Harvardit, pas përplasjeve të vazhdueshme mes administratës së tij dhe institucioneve akademike. Sipas tij, Harvard ka vepruar në mënyrë “paligjshme dhe të neveritshme”, duke mos zbatuar siç duhet kërkesat për të luftuar antisemitizmin gjatë protestave pro-palestineze — akuza që universiteti i ka mohuar.

Lajmi vjen pas një sfide ligjore të gjatë: në prill të vitit 2025, Trump anuloi rreth 2 miliardë dollarë grante kërkimore për Harvardin dhe ngriu financimin federal, veprim që u padit nga universiteti. Gjykata federale anuloi më vonë shkurtimeve, duke vendosur se qeveria kishte shkelur të drejtat e Harvardit për lirinë e shprehjes.

Para njoftimit të së hënës, administrata kishte qenë në bisedime për një marrëveshje të mundshme me Harvardin. Megjithatë, Trump deklaroi se tani po kërkojnë 1 miliard dollarë dhe nuk duan më asnjë lidhje me universitetin. Ai gjithashtu ka kërcënuar se mund të heqë statusin e përjashtimit nga taksat dhe të marrë kontrollin e patentave që burojnë nga kërkimet e financuara nga fondet federale.

Tre universitete të tjera të Ivy League — Columbia, Penn dhe Brown — arritën marrëveshje me administratën për të ruajtur financimin federal, duke shmangur gjykatën, ndërsa Harvard mbetet në qendër të një konflikti ligjor dhe politik që mund të ketë pasoja të gjera për universitete private në SHBA.