Shpallen performuesit e Grammy Awards 2026: Justin Bieber, Lady Gaga, Sabrina Carpenter…
Akademia e Regjistrimeve ka konfirmuar listën zyrtare të performuesve për Grammy Awards 2026, ceremonia që do të mbahet këtë të diel në Crypto.com Arena në Los Angeles dhe do të transmetohet drejtpërdrejt në mbarë botën.
Një nga rikthimet më të shumëpritura të mbrëmjes është ai i Justin Bieber, i cili do të ngjitet në skenën e Grammy-t për herë të parë pas katër vitesh. Këngëtari kanadez hyn në këtë edicion me katër nominime, përfshirë edhe Albumin e Vitit, pas rikthimit të papritur në muzikë verën e kaluar me projektet Swag dhe Swag II. Albumi i dytë solli këngë si “Love Song” dhe “Speed Demon” dhe shënoi materialin e tij të parë të ri pas një pauze të gjatë.
Në skenën e Grammy-t do të performojnë edhe të gjithë të nominuarit për Best New Artist. Olivia Dean, Addison Rae, Katseye, Sombr, Leon Thomas, Lola Young dhe Alex Warren do të bashkohen në një performancë të përbashkët (medley), që feston vitin e tyre të shpërthimit artistik. Për Dean, kjo do të jetë paraqitja e saj e parë në Grammy, pak para nisjes së turneut botëror, ndërsa Rae po vazhdon të forcojë pozicionin e saj pas publikimit të albumit debutues Addison.
Lady Gaga do të rikthehet sërish në skenën e ceremonisë, ku ka performuar disa herë ndër vite. Ajo hyn në garë në edicionin 2026 me shtatë nominime, përfshirë Albumin e Vitit, Këngën e Vitit dhe Regjistrimin e Vitit.
Për të dytin vit radhazi, në Grammy do të performojë edhe Sabrina Carpenter, këtë herë me materiale nga albumi i saj Man’s Best Friend. Artistja është nominuar në gjashtë kategori, pas një viti me sukses të madh komercial.
Lista e performuesve përfshin gjithashtu grupin indie pop The Marías, grupin global të vajzave Katseye, si dhe artistët në rritje Sombr dhe Leon Thomas. Ndërkohë, dueti hip-hop Clipse do të bashkohet me Pharrell Williams për një performancë të përbashkët speciale.
Një nga momentet më emocionale të mbrëmjes pritet të jetë segmenti “In Memoriam”, i cili do të udhëhiqet nga Reba McEntire, Lauryn Hill dhe Post Malone, për të nderuar artistët që u ndanë nga jeta gjatë vitit 2025.
Grammy Awards 2026 pritet të sjellë një mbrëmje të pasur artistike, duke ndërthurur emra të mëdhenj të industrisë muzikore me talentet më premtuese të brezit të ri.
