Drita fiton Superkupën e Kosovës
Drita e Gjilanit e ka nisur vitin futbollistik në mënyrën më të mirë të mundshme, duke fituar Superkupën e Kosovës pas fitores 2-1 ndaj Prishtinës. Ky është trofeu i dytë i kësaj gare për klubin gjilanas.
Ndeshja u zhvillua në “Mardan Sports Complex” në Antalya të Turqisë dhe ofroi ritëm të lartë dhe emocione që në minutat e para. Prishtina kaloi e para në epërsi në minutën e tetë, kur Leotrim Kryeziu realizoi me saktësi për 1-0. Reagimi i Dritës ishte i shpejtë dhe i vendosur, duke barazuar rezultatin në minutën e 39-të me golin e Besnik Krasniqit.
Momente kyçe të takimit erdhën në fund të pjesës së parë, kur Prishtina mbeti me një lojtar më pak pas ndëshkimit me karton të kuq të Harun Kariqit. Kjo situatë ndikoi në rrjedhën e lojës në pjesën e dytë, ku Drita shfrytëzoi epërsinë numerike dhe gjeti golin vendimtar në minutën e 50-të, me Kristal Abazajn që u tregua i saktë para portës kundërshtare.
Me këtë fitore, Drita shton në vitrinën e saj trofeun e dytë të Superkupës së Kosovës, pas atij të edicionit 2018/2019. Ndërkohë, Prishtina mbetet klubi më i suksesshëm në historinë e kësaj gare, me gjithsej 11 trofe të fituar.
