Meta i bën thirrje Australisë: Rishqyrtoni ndalimin e mediave sociale për të miturit

Gjigandi amerikan i teknologjisë, Meta, i bëri sot thirrje qeverisë australiane të rishqyrtojë vendimin e saj për ndalimin e përdorimit të mediave sociale nga personat nën 16 vjeç. Ky ligj i ri, i cili hyri në fuqi më 10 dhjetor, prek platforma të mëdha si Facebook, Instagram, TikTok, Snapchat, YouTube, Reddit, Threads, X, si dhe platformat e transmetimit Kick dhe Twitch.

Meta njoftoi se ka bllokuar mbi 544,000 llogari që përkisnin të miturve: 331,000 në Instagram, 173,000 në Facebook dhe 40,000 në Threads në javën para 11 dhjetorit. Kompania riafirmoi angazhimin e saj për t’iu përmbajtur ligjit, por theksoi se ndalimet e përgjithshme nuk janë zgjidhja më e mirë.

“Ne i bëjmë thirrje qeverisë australiane të punojë konstruktivisht me industrinë për të gjetur një zgjidhje më të mirë, siç është ofrimi i stimujve për rritjen e standardit të sigurisë dhe përvojës online të përshtatshme për moshën,” tha Meta. Kompania gjithashtu sugjeroi që platformat të verifikojnë moshën e përdoruesve dhe të kërkojnë pëlqimin e prindërve para shkarkimit të aplikacioneve nga përdorues nën 16 vjeç.

Ky ligj vendos gjoba deri në 28 milionë euro për kompanitë që nuk ndërmarrin masa të arsyeshme për të garantuar përmbushjen e rregullave, duke shënuar një hap të ri dhe të diskutueshëm në rregullimin e teknologjisë dhe mediave sociale në botë.