Franca njeh zyrtarisht muzikën elektronike si “Trashëgimi Kulturore Jomateriale”

Muzika elektronike ka marrë njohje zyrtare në Francë si pjesë e Trashëgimisë Kulturore Jomateriale, duke shënuar një hap historik për rolin e saj në formësimin e identitetit artistik dhe kulturor të vendit. Ky vendim e vendos zhanrin në inventarin kombëtar të trashëgimisë jomateriale, krahas formave të tjera të shprehjes kulturore që kanë lënë gjurmë të thella në shoqërinë franceze.

Ministrja franceze e Kulturës, Rachida Dati, theksoi se muzika elektronike “ka vendin e saj të merituar në trashëgiminë tonë jomateriale kombëtare”, duke nënvizuar gjithashtu rëndësinë e klubeve të natës si hapësira të shprehjes artistike dhe festimit.

Me këtë njohje, legjendat e muzikës elektronike si Air, Cassius, Daft Punk, Justice dhe Jean-Michel Jarre konsiderohen shtylla të kulturës franceze. Veçanërisht Jean-Michel Jarre, i cili në fund të viteve ’70 revolucionarizoi zhanrin me albumin “Oxygène”, të realizuar tërësisht me sintetizatorë të hershëm dhe pa vokale, duke krijuar një pikë referimi globale dhe duke hapur rrugën për lëvizjen e famshme “French Touch”.

Publikuar në 1976, “Oxygène”, së bashku me albumet pasuese “Équinoxe” dhe “Zoolook”, ndikoi jo vetëm në skenën franceze, por edhe në zhvillimin e muzikës elektronike në mbarë botën. Trashëgimia e tij vazhdon të frymëzojë breza të rinj artistësh dhe producentësh.

Jean-Michel Jarre ka kontribuar përtej krijimtarisë, duke shërbyer si president i CISAC, konfederata botërore e shoqatave të autorëve, dhe si Ambasador i UNESCO-s që nga viti 1993, duke mbrojtur muzikën elektronike si formë arti dhe trashëgiminë jomateriale. Në vitin 2021, presidenti Emmanuel Macron e nderoi Jarre me Legjionin e Nderit në rangun e Komandantit, duke vlerësuar kontributin e tij të jashtëzakonshëm artistik dhe kulturor.