Sot nis zyrtarisht fushata për balotazhin e zgjedhjeve lokale
Sot ka nisur zyrtarisht fushata zgjedhore për raundin e dytë të zgjedhjeve lokale për kryetarë komunash. Fushata do të zgjasë deri më 9 nëntor, në orën 07:00 të mëngjesit, kur hapen zyrtarisht qendrat e votimit.
Kjo fazë e garës zgjedhore do të zhvillohet për gjashtë ditë dhe përfundon në momentin e hapjes së vendvotimeve në ditën e zgjedhjeve.
Balotazhi do të mbahet në 18 komuna të vendit, përfshirë: Gjakovën, Gjilanin, Dragashin, Kaçanikun, Klinën, Fushë Kosovën, Mitrovicën e Jugut, Obiliqin, Rahovecin, Pejën, Prishtinën, Prizrenin, Suharekën, Vitinë, Vushtrrinë, Junikun, Mamushën dhe Kllokotin.
Në nivel vendi, Lëvizja Vetëvendosje (LVV) prin me numrin më të madh të garave në balotazh, e ndjekur nga Lidhja Demokratike e Kosovës (LDK), Partia Demokratike e Kosovës (PDK), Aleanca për Ardhmërinë e Kosovës (AAK) dhe Lista Serbe.
Pjesëmarrja në balotazh është si vijon:
- LVV – në 12 komuna
- LDK – në 9 komuna
- PDK – në 6 komuna
- AAK – në 5 komuna
- Lista Serbe – në 1 komunë (Kllokot)
Ndërkohë, disa subjekte politike kanë siguruar fitore pa balotazh në raundin e parë:
- LVV ka fituar në Kamenicë, Podujevë dhe Shtime.
- PDK ka siguruar fitore në Skenderaj, Ferizaj dhe Han të Elezit.
- LDK ka fituar në Istog dhe Lipjan.
- AAK ka fituar në Deçan.
Gjithashtu, gara është përmbyllur më 12 tetor për Ramiz Lladrovcin në Drenas dhe për Nismën Socialdemokrate në Malishevë, ndërsa Lista Serbe ka fituar pa balotazh në nëntë komuna me shumicë serbe.
