Yjet e Teatrit të Gjilanit shkëlqejnë në Festivalin e Teatrove

Në Festivalin e Teatrove në Ferizaj, shfaqja “God Bless America” e autorit dhe regjisorit Fatos Berisha bëri namin duke marrë disa nga çmimet kryesore të mbrëmjes. Aurita Agushi u shpall me rolin episodik më të mirë, Kushtrim Qerimi mori çmimin si aktori më i mirë në rol dytësor, ndërsa çmimi i madh “Ismail Rama” për aktorin më të mirë shkoi për Avni Shkodrën. Një treshe fitoreje që e vuri Gjilanin në qendër të vëmendjes!

Por festa nuk ndalet këtu – skenografi Bekim Korça mori çmimin për skenografinë më të mirë me shfaqjen “13” (produksion nga Teatri “Adriana”), ndërsa kryefjala e festivalit ishte shfaqja “DJALI”, një bashkëpunim i Anamour me Ernest Zymberin, e sjellë në regji nga Erson Zymberi, që rrëmbeu çmimin kryesor “Shfaqja më e mirë”. Dhe për ta mbyllur me stil, aktori i ri Yzeir Meha u shpall “Ylli në ardhje” për rolin e tij si Djali. Një mbrëmje plot energji, duartrokitje e krenari për artin e skenën tonë!