Sukses ndërkombëtar për Kosovën: Shërbimi Korrektues shpërblehet me Çmimin e Ekselencës në Stamboll

Kosova ka marrë një vlerësim të madh në arenën ndërkombëtare!
Në Forumin Ndërkombëtar të Shefave të Shërbimeve, që u mbajt në Stamboll, Shërbimi Korrektues i Kosovës (ShKK) është nderuar me Çmimin Ndërkombëtar të Ekselencës nga Organizata Ndërkombëtare e Burgjeve (ICPA).

Ky çmim prestigjioz u dha për projektin “Rehabilitimi Gjithëpërfshirës dhe Kujdesi Shëndetësor”, një nismë që synon modernizimin e sistemit korrektues të vendit, me fokus në kujdesin njerëzor, integrimin social dhe standardet profesionale ndërkombëtare.

Në njoftimin e bërë publik në rrjetet sociale, Shërbimi Korrektues ka theksuar se kjo arritje është rezultat i përkushtimit, profesionalizmit dhe vizionit për një sistem më efikas dhe më human.

“Krenarë për ekipin tonë dhe për Kosovën që po njihet në arenën ndërkombëtare për punë dhe rezultate të jashtëzakonshme,” – thuhet në postim.

Ky sukses e vendos Kosovën mes vendeve që po njihen për inovacionin dhe humanizimin e sistemit korrektues, duke dëshmuar se edhe nga një shtet i vogël mund të dalin shembuj të mëdhenj profesionalizmi.