PDK hap fushatën zgjedhore në Prizren, Bedri Hamza nis garën për Kryeministër

Me nisjen zyrtare të fushatës për zgjedhjet e jashtëzakonshme parlamentare të 28 dhjetorit, Partia Demokratike e Kosovës hap një kapitull të ri politik, duke prezantuar vizionin e saj për vendin nën udhëheqjen e kandidatit për kryeministër, Bedri Hamza. Hapja e fushatës do të zhvillohet në Prizren, qytet simbolik për historinë dhe mobilizimin politik të PDK-së.

Ngjarja qendrore e ditës është paraparë të mbahet në Palestrën e Sportit “Sezai Surroi”, ku nga ora 17:45 do të bëhet hapja zyrtare e fushatës zgjedhore. Aty pritet që drejtuesit e partisë dhe kandidati për kryeministër t’u drejtohen mbështetësve me mesazhe programore dhe thirrje për mobilizim elektoral.

Pas Prizrenit, fushata vazhdon në jug të vendit. Nga ora 18:45, Bedri Hamza dhe strukturat e PDK-së do të mbajnë tubim zgjedhor në Shtëpinë e Kulturës “Alajdin Xhezairi” në Bresanë të Dragashit, duke përcjellë mesazhin e tyre edhe te qytetarët e kësaj zone.

Partia Demokratike e Kosovës në këto zgjedhje garon me numrin 130, duke synuar të rikthehet në qendër të skenës politike përmes një fushate që pritet të shtrihet në të gjitha qytetet e Kosovës.