Moment Historik për Kinematografinë e Kosovës: “Shame and Money” fiton Çmimin e Madh në Sundance
Filmi i regjisorit kosovar Visar Morina, Shame and Money (Shaban dhe Hatixhe), ka bërë histori duke fituar Grand Jury Prize në Sundance Film Festival, një nga festivalet më prestigjioze ndërkombëtare të filmit. Kjo është një arritje e jashtëzakonshme për kinematografinë kosovare, duke vënë në qendër talentin dhe vizionin artistik të vendit tonë.
Kritika ndërkombëtare e ka përshkruar filmin si një dramë të thellë që eksploron dinjitetin njerëzor nën presionin e kapitalizmit. The Film Verdict e ka cilësuar si “një dramë observuese, e fuqishme dhe e ndjerë”, ndërsa Next Best Picture thekson se bëhet fjalë për “një analizë emocionuese të shkatërrimit të shpirtit njerëzor përballë presionit ekonomik”.
Në qendër të tregimit është një familje kosovare që përballet me sfidën e zhvendosjes në Prishtinë pas humbjes së jetesës në fshat dhe përpjekjen për të gjetur vendin e saj në një shoqëri hiperkapitaliste. Performancat e aktorëve Astrit Kabashi, Flonja Kodheli, Kumrije Hoxha, Fiona Gllavica, Alban Ukaj dhe të tjerëve, së bashku me regjinë e përmbajtur dhe realizmin social, e bëjnë filmin një nga titujt më të diskutuar të këtij edicioni.
Shame and Money është një bashkëprodhim ndërkombëtar me prodhues Fabian Altenried, Sophie Ahrens, Kristof Gerega, Pia Hellenthal dhe Visar Morina, në bashkëpunim me Eagle Eye Films Kosova, Vertigo Ljubljana dhe kompani të tjera partner. Skenari është shkruar nga Visar Morina dhe Doruntina Basha, me fotografi nga Janis Mazuch dhe montazh nga Joëlle Alexis. Filmi ka përkrahje nga institucione të rëndësishme kinematografike europiane dhe kombëtare, përfshirë Qendrën Kinematografike të Kosovës, Eurimages, si dhe fonde nga Gjermania, Sllovenia, Maqedonia e Veriut dhe Belgjika.
Ky sukses ndërkombëtar është një dëshmi e fuqisë së historive kosovare dhe vizionit të artistëve të saj, duke vendosur Kosovën në hartën e kinemasë botërore.
Kujtojmë se në shkurt të vitit 2021, filmi artistik nga Kosova “Zgjoi”, me regji të Blerta Bashollit, fitoi tri çmimet kryesore në Sundance Film Festival: Çmimin për Filmin më të Mirë, Regjinë më të Mirë dhe Çmimin e Publikut në festivalin më të madh të filmit të pavarur në Shtetet e Bashkuara.
