Kosova dhe Bahamas nisin një kapitull të ri: vizat hiqen së shpejti

Kosova ka bërë një tjetër hap të madh në rrugën e saj diplomatike. Presidentja Vjosa Osmani bëri të ditur se Bahamas, shteti i 121-të që njeh pavarësinë e Kosovës, ka rënë dakord për heqjen reciproke të vizave me vendin tonë. Lajmi u konfirmua pas takimit të saj në Washington me zëvendëssekretarin amerikan të Shtetit, Christopher Landau.

“Vazhduam në Bahamas ku morëm njohjen e shtetit. Po ashtu kemi arritur dakordim me kryeministrin e Bahamas për heqjen reciproke të vizave, dhe kjo marrëveshje do të nënshkruhet shumë shpejt këtu në Washington D.C,” deklaroi Osmani, duke vënë theksin mbi rëndësinë historike të këtij hapit.

Në këtë mënyrë, qytetarët e Kosovës dhe të Bahamas do të mund të udhëtojnë pa viza mes dy vendeve, duke thelluar bashkëpunimin ekonomik, kulturor dhe turistik. Marrëveshja pritet të sjellë edhe mundësi të reja për studentët dhe profesionistët që kërkojnë eksperienca ndërkombëtare.

Ky moment nuk është vetëm një lajm për diplomacinë, por edhe një simbol i njohjes globale të Kosovës si shtet i pavarur dhe sovran. Në një kohë kur çdo njohje ka peshën e vet, Bahamas e bën të qartë se besimi ndërkombëtar në Kosovën po rritet çdo ditë.