Dua Lipa viziton muzeun“Reporting House” në Prishtinë

Pas performancës spektakolare në Sunny Hill Festival, këngëtarja me famë botërore Dua Lipa vizitoi muzeun Reporting House në Prishtinë, mbrëmjen e 4 gushtit 2025. E shoqëruar nga babai i saj Dukagjin Lipa, i fejuari Callum Turner, vëllai Gjin Lipa dhe të afërm të tjerë, Dua kaloi disa momente reflektimi dhe respekti në këtë hapësirë të veçantë të kujtesës kolektive.

Ajo u prit nga producentja Jeta Xharra, kuratori Gazmend Ejupi, gazetarja Donika Shahini dhe stafi i muzeut. Gjatë vizitës, Dua u shpreh me emocion: “Keni bërë një punë të mrekullueshme për të treguar historinë e Kosovës në këtë muze”, duke nënvizuar rëndësinë e ruajtjes dhe dokumentimit të së shkuarës përmes një forme kaq autentike e prekëse.

Callum Turner, aktor britanik dhe partner i saj, tregoi interes të veçantë për pamjet dokumentare të trupave speciale britanike që u panë duke skanuar Prishtinën për mina menjëherë pas ndërhyrjes së NATO-s. Ndërkohë, Dua e ndihmonte të identifikonte lagjet dhe vendet që ajo i njihte nga fëmijëria e saj, të shfaqura në xhirimet e BBC-së nga viti 1999.

Reporting House është një ekspozitë unike që, 25 vjet pas përfundimit të luftës në Kosovë, dokumenton ngjarjet përmes punës së gazetarëve, fotografëve dhe artistëve. Kjo iniciativë është realizuar nga BIRN Kosova, KALLXO.com, Bienalja e Prishtinës dhe Paper Gallery, dhe sjell bashkë një arkiv të rrallë historik me vepra arti bashkëkohor që reflektojnë mbi ndikimin e luftës në shoqëri.

I vendosur në qendër të Prishtinës, muzeu është i hapur për vizitorët dhe ofron një përvojë të thellë emocionale dhe edukative për këdo që dëshiron të kuptojë më shumë për të kaluarën e Kosovës – përmes syve të raportimit, kujtesës dhe artit.

Vizita e Dua Lipës e vulosi edhe më shumë rëndësinë që kjo hapësirë ka për brezat e sotëm dhe të ardhshëm.