Baleti Kombëtar i Kosovës shfaq “Carmina Burana” në skenat prestigjioze italiane

Pas jehonës së madhe që pati në Prishtinë, Baleti Kombëtar i Kosovës është gati të pushtojë skenat italiane me kantatën skenike “Carmina Burana”, me koreografi nga Toni Candeloro. Ky projekt monumentale, që bashkon fuqinë e Filharmonisë së Kosovës dhe Operës së Kosovës, ka tërhequr vëmendjen për mënyrën e jashtëzakonshme se si ndërthur muzikën korale me energjinë e vallëzimit modern.

Më 29 nëntor, trupa do të performojë në Venecia me ftesë nga festivali prestigjioz “VeneziainDanza”, një mundësi e rrallë për t’u prezantuar para një audience ndërkombëtare dhe kritikëve më të njohur të baletit. Dy ditë më vonë, më 1 dhjetor, shfaqja do të zhvendoset në Potenza, duke sjellë në Itali një nga krijimet më të mëdha të Baletit Kombëtar të Kosovës.

Premiera e “Carmina Burana” u zhvillua në qershor në Prishtinë dhe u prit me vlerësime të larta nga publiku dhe kritika, duke shënuar një nga momentet më të rëndësishme të skenës artistike kosovare këtë vit. Përveç muzikës dhe koreografisë, performanca ka tërhequr vëmendje për vizualitetin dhe energjinë dramatike që përcjell çdo kërcim dhe interpretim.

Ky udhëtim në Itali jo vetëm që konsolidon reputacionin e Baletit Kombëtar të Kosovës, por edhe e afirmon skenën artistike kosovare si një aktor serioz dhe kreativ në arenën ndërkombëtare të kulturës.