Taylor Swift dhuron 197 milionë dollarë bonuse për ekipin e “Eras Tour” si falënderim për dy vite historike

Ndërsa “Eras Tour” u shndërrua në turneun më fitimprurës në historinë e muzikës, Taylor Swift vendosi që suksesi të mos mbetej vetëm në skenë. Përgjatë dy viteve të turneut global, këngëtarja ka shpërndarë 197 milionë dollarë bonuse për ekipin dhe performuesit, përveç pagave të tyre të rregullta, duke e kthyer fundin e turneut në një dhuratë të jashtëzakonshme për Krishtlindje.

Sipas PEOPLE, bonuse kanë përfituar qindra profesionistë që qëndruan pas çdo koncerti: nga shoferët e kamionëve dhe ekipi i kateringut, te teknikët e ndriçimit dhe zërit, balerinët, banda, sigurimi, grimierët, koreografët, fizioterapistët dhe ekipi i videos. Vetëm në gusht 2023, pas përfundimit të pjesës së parë të turneut në Amerikën e Veriut, Swift kishte shpërndarë mbi 55 milionë dollarë, ndërsa shuma totale për dy vite arriti në 197 milionë.

Turneu nisi në mars 2023 në Glendale, Arizona, dhe u mbyll më 8 dhjetor 2024 në Vancouver, pas 149 shfaqjeve. Kompania Taylor Swift Touring konfirmoi se mbi 10.1 milionë persona ndoqën koncertet, ndërsa u shitën më shumë se 2.07 miliardë dollarë bileta, duke e bërë “Eras Tour” turneun me fitimin më të lartë nga biletat në histori.

Përtej skenës, viti 2024 u mbyll si një tjetër kulm për Swift: libri “Taylor Swift | The Eras Tour Book” pati nisjen më të fortë të vitit në botime, ndërsa ajo u shpall artistja më e dëgjuar në platformat kryesore muzikore. Me 6 nominime Grammy dhe pritshmëri të larta për 2025, duket se edhe pse një “era” u mbyll, kapitulli i radhës sapo ka nisur.