“Kabare 99” nis rrugëtimin drejt skenës – Teatri i Gjilanit sjell premierën që prek zemrën e Kosovës së pasluftës

Në skenën e Teatrit të Gjilanit ka nisur të pulsojë një ritëm i ri. Dritat e sallës janë ndezur për provat e “Kabare 99”, shfaqjes që pritet ta hapë vitin 2026 me një energji të pazakontë. Regjisorja Zana Hoxha, e njohur për vepra që prekin, sfidojnë dhe frymëzojnë, po rikthen në skenë Kosovën e pasluftës – një kohë e lodhjes, e ringritjes dhe e një shprese të brishtë që s’vdiste kurrë.

“Kabare 1999” e çon publikun në një Prishtinë të sapogjallëruar, ku realiteti dhe performanca ndërthuren brenda mureve të “Klub Europa”. Aty, Aida – protagoniste që endet mes ditëve të vështira dhe netëve plot dritë – përpiqet të ndërtojë jetën e saj të re. Shfaqja përzien humorin e zi, muzikën dhe ironinë me plagët e një vendi që po mësonte të merrte frymë pas luftës.

Në këtë rrugëtim krijues, Zana Hoxha sjell përvojën dhe sukseset e saj ndërvite. Me dhjetëra çmime, me koproduksione ndërkombëtare dhe me një karrierë që bashkon artin me aktivizmin, ajo ndërton shfaqje që flasin fort. “Kabare 99” s’është vetëm një produksion – është një rikthim tek kujtesa kolektive, një reflektim mbi identitetin dhe një ftesë për të parë veten nga një këndvështrim i ri.

Premiera vjen në janar 2026, si bashkëpunim mes Teatrit të Qytetit të Gjilanit dhe Artpolis. Vendoseni në kalendar. Kjo është një shfaqje që premton emocione të forta – dhe një histori që nuk duhet humbur.