Zbulime të reja arkeologjike në kalanë e Kastërcit, Suharekë

Në kalanë e Kastërcit, toka ka filluar të rrëfejë historinë e saj. Gërmimet e fundit nga Instituti Arkeologjik i Kosovës, nën drejtimin e arkeologut Berat Ademi, kanë zbuluar plotësisht bazilikën paleokristiane të shekullit VI – një dëshmi e hershme e krishterimit në këtë trevë.

Fragmentet e qeramikës, xhamit, afreskave dhe tjegullave me mbishkrim e bëjnë këtë lokalitet një thesar kulturor me rëndësi të veçantë. Pas shkatërrimit nga dyndjet sllave, bazilika u shndërrua në hapësirë varrimi, ku deri tani janë gjetur rreth 80 varre.

Krahas gërmimeve, po kryhen edhe punime konservuese e restauruese, për ta mbrojtur këtë trashëgimi dhe për ta shndërruar në një atraksion të turizmit kulturor.

Kalaja e Kastërcit, ky rojtar i heshtur i shekujve, sot na rikujton se rrënjët tona janë të thella dhe të gjalla, duke ofruar mundësi të reja për kulturën dhe zhvillimin e Suharekës.