Vota e diasporës drejt zgjedhjeve të 28 dhjetorit: Sot afati i fundit për regjistrim

Procesi i regjistrimit të votuesve nga diaspora ka hyrë në ditën e tij të fundit, ndërsa interesimi këtë vit ka qenë dukshëm i lartë.

Komisioni Qendror i Zgjedhjeve ka konfirmuar se deri më tani 63,997 qytetarë që jetojnë jashtë vendit kanë aplikuar për të marrë pjesë në zgjedhjet e parakohshme parlamentare të 28 dhjetorit.

KQZ e cilëson këtë pjesëmarrje si një hap thelbësor drejt fuqizimit të rolit të diasporës në proceset vendimmarrëse, duke theksuar se vota e tyre shpesh ka pasur peshë të madhe në rezultatet zgjedhore.

“Mos e humbni mundësinë që zëri juaj të dëgjohet! Afati i fundit për regjistrim është 6 dhjetor 2025”, thuhet në njoftimin zyrtar të publikuar në Facebook.

Institucioni u ka bërë thirrje të gjithë të interesuarve që ende nuk kanë përfunduar aplikimin, ta bëjnë këtë sa më shpejt, pasi sistemi i regjistrimit do të mbyllet përfundimisht pas përfundimit të afatit.

Regjistrimi i diasporës mbetet një element kyç i procesit demokratik, duke garantuar përfshirjen e qytetarëve kudo që jetojnë dhe punojnë.