Senati i Nju-Jorkut nderon Kosovën me rezolutë për 18-vjetorin e pavarësisë
Senati i Nju-Jorkut ka miratuar një Rezolutë të veçantë në nder të 18-vjetorit të shpalljes së pavarësisë së Republikës së Kosovës, duke e cilësuar vendin si partner dhe aleat të rëndësishëm të Shteteve të Bashkuara.
Rezoluta u sponsorizua nga senatorja Jessica Scarcella-Spanton dhe u mbështet nga dhjetëra bashkë-sponsorë nga të dyja partitë kryesore. Dokumenti shënon zyrtarisht datën historike të 17 shkurtit 2008 dhe vlerëson progresin e Kosovës si një nga shtetet më të reja në Evropë. Ai nënvizon gjithashtu rëndësinë e partneritetit strategjik mes Shteteve të Bashkuara dhe Kosovës, si dhe kontributin e komunitetit kosovar në kulturën, ekonominë dhe jetën sociale të Nju-Jorkut.
Gjatë votimit, shumica e senatorëve u bashkuan për të njohur rrugëtimin historik të Kosovës, përfshirë luftën e viteve 1998–1999, ndërhyrjen e NATO-s dhe konsolidimin e institucioneve shtetërore pas pavarësisë. Rezoluta kujton gjithashtu rrënjët historike të vendit që nga Dardania e lashtë, duke theksuar rëndësinë e promovimit të vlerave demokratike dhe zhvillimit të qëndrueshëm në rajon.
Senati i Nju-Jorkut thekson se qytetarët e Kosovës kanë arsye të jenë krenarë për arritjet e tyre në ndërtimin e institucioneve demokratike, sundimin e ligjit dhe krijimin e mundësive ekonomike.
Në përmbyllje, organi legjislativ shpreh urimet më të mira për popullin e Kosovës dhe përcjell mesazhin e qartë se ky vend do të vazhdojë të konsiderohet mik dhe partner i ngushtë i Shteteve të Bashkuara.
