Rrugëtimi i ‘Horizontit’: 45 vjet mendim logjik, mistere dhe mirënjohje

Më 15 janar 1981, një numër i vogël, por plot mister, doli në dritë në qytetin e Gjilanit – numri i parë i revistës për enigmatikë “Horizonti”. Asokohe, pak e dinin se kjo revistë do të bëhej një referencë e rëndësishme për kulturën enigmatike shqiptare dhe do të frymëzonte breza të tërë lexuesish.

Sot, 45 vjet më vonë, Shoqata e Enigmatëve “Ndre Mjeda” e Gjilanit organizoi një ceremoni për të nderuar këtë rrugëtim. Mirënjohje u ndanë për individë dhe bashkëpunëtorë që kanë kontribuar në suksesin e revistës – nga autorë dhe redaktorë, te recensentët dhe lexuesit besnikë.

Kushtrim Zeqiri, u. d. i drejtorit për Kulturë, Rini e Sport në Komunën e Gjilanit, e përshkroi këtë jubile si një ngjarje me rëndësi të madhe për enigmatikën shqiptare. Ai vlerësoi kontributin e kryeredaktorit Zijadin Hasani dhe të Shemsedin Kryeziu, kreut të Shoqatës, për përkushtimin dhe punën e palodhur që ka mbajtur gjallë këtë traditë.

“Horizonti ka qenë një shkollë e mendimit logjik dhe një nxitës i kureshtjes intelektuale, duke afirmuar vlerat kulturore shqiptare,” tha Zeqiri. Ai nënvizoi rëndësinë e mbështetjes institucionale dhe e quajti këtë investim në kulturë dhe edukim të brezave të rinj një vlerë të pazëvendësueshme.

Nga ana e tij, kryetari i Shoqatës, Shemsedin Kryeziu, riktheu kujtime nga dekadat e veprimtarisë së revistës dhe theksoi se “Horizonti” ka kontribuar drejtpërdrejt në institucionalizimin e enigmatikës shqiptare, duke krijuar një traditë të qëndrueshme për autorë dhe krijues të rinj.

Mirënjohje u dhanë gjithashtu themeluesve të Shoqatës dhe enigmatëve nga Lugina e Preshevës, si dhe ministrit të Kulturës, Hajrulla Çeku, duke shënuar një përvjetor që bashkon historinë, përkushtimin dhe dashurinë për kulturën enigmatike.