Royal Beverage nënshkruan marrëveshje për zgjerimin e produkteve kosovare në Lindjen e Mesme

Strategic Group ka nënshkruar një marrëveshje të rëndësishme bashkëpunimi me kompaninë ndërkombëtare Royal Beverage LLC, në pronësi të biznesmenit Premtim Mustafa, duke krijuar mundësi konkrete për depërtimin e produkteve kosovare në tregun e Lindjes së Mesme.

Kjo marrëveshje përbën një hap strategjik drejt rritjes së eksportit të Kosovës dhe forcimit të pranisë së produkteve “Made in Kosovo” në tregje të reja me potencial të lartë.

Përmes këtij partneriteti, prodhuesit vendorë do të përfitojnë mundësi më të mëdha për shpërndarje, rritje të kapaciteteve prodhuese si dhe përmbushje të standardeve ndërkombëtare të cilësisë.

Bashkëpunimi me Royal Beverage LLC pritet të ketë ndikim të drejtpërdrejtë në zhvillimin ekonomik, duke kontribuar në krijimin e vendeve të reja të punës, forcimin e zinxhirit të prodhimit lokal dhe promovimin e imazhit të ekonomisë së Kosovës në arenën ndërkombëtare.

Strategic Group vazhdon të dëshmojë përkushtimin e saj në ndërtimin e partneriteteve të qëndrueshme, që krijojnë vlerë reale për bizneset vendore dhe për ekonominë e Kosovës në tërësi, duke e pozicionuar vendin si një partner serioz dhe konkurrues në tregjet globale.