Rihapet pas 35 vitesh Galeria e Arteve e Prishtinës – një kthim historik për skenën kulturore

Pas më shumë se 30 vitesh, Galeria e Arteve e Prishtinës (GAP) është rikthyer në jetën kulturore të kryeqytetit. Rihapja u shënua më 27 dhjetor 2025 me ekspozitën “Retrosintezë”, një përmbledhje e veprave të artistëve të njohur shqiptarë të Kosovës, e organizuar nga Asociacioni i Artistëve Vizual të Kosovës (AAVK).

E themeluar në vitin 1979, GAP ka qenë një nga institucionet kryesore për promovimin e artit pamor në Prishtinë. Megjithatë, në vitin 1990, ajo u mbyll nga regjimi serb, duke lënë një boshllëk të madh në skenën artistike dhe kulturore. Rihapja në Pallatin e Rinisë synon të rikthejë këtë hapësirë në qendër të krijimtarisë dhe dialogut kulturor.

Galeria do të bashkëmenaxhohet nga Komuna e Prishtinës dhe AAVK, me një Këshill Artistik prej pesë anëtarësh dhe koordinator/e për funksionimin e përditshëm. Programi i GAP-së për vitin 2026 do të përfshijë ekspozita lokale dhe ndërkombëtare, programe edukative dhe bashkëpunime rajonale, duke siguruar profesionalizëm dhe përfshirje të komunitetit artistik.

Artistët dhe ekspertët e skenës pamore vlerësojnë rihapjen si një moment historik, por paralajmërojnë se suksesi i Galerisë kërkon vizion të qartë kuratorial dhe politika të qëndrueshme. Siç nënvizojnë ata, GAP duhet të funksionojë si platformë për prodhim artistik, reflektim kritik dhe edukim, duke mbështetur trashëgiminë kulturore dhe duke e lidhur atë me praktikat bashkëkohore.

Në ekspozitën “Retrosintezë” u prezantuan vepra të Ibrahim Kodra, Muslim Mulliqi, Gjelosh Gjokaj, Agim Çavderbasha, Rexhep Ferri, Kadrush Rama, Tahir Emra, Nysret Salihi-Hamixhiqi, Adem Kastrati, Hamdi Bardhi dhe të tjerë. Ajo u pasua nga Ekspozita Vjetore e Anëtarëve të AAVK-së, që aktualisht është e hapur për publikun, duke rikthyer vëmendjen tek arti pamor dhe aktiviteti kulturor në Prishtinë.

Fotografite: Kallxo.com