Prishtina Music Week 2025: Një javë e muzikës që frymon në çdo qoshe të Prishtinës

Prishtina është mbushur sërish me energjinë e muzikës dhe krijimtarisë! Edicioni i pestë i Prishtina Music Week ka nisur më 1 nëntor dhe po vazhdon me një program të pasur që do të kulmojë me Konferencën e Muzikës në Prishtina, më 7 dhe 8 nëntor, duke e kthyer kryeqytetin në një qendër rajonale të artit dhe industrisë muzikore.

Kjo javë unike, që bashkon koncerte, ekspozime, panele dhe punëtori, ka sjellë në skenë artistë, kuratorë dhe profesionistë nga Kosova dhe nga mbarë rajoni, të cilët ndajnë ide dhe perspektiva mbi të ardhmen e industrisë kulturore.

Konferenca e Muzikës në Prishtinë: 5 vite dialog, vizion dhe zhvillim

Këtë vit, Konferenca e Muzikës në Prishtina shënon pesëvjetorin e saj. Ajo nisi si një hapësirë për diskutim dhe shkëmbim idesh rreth muzikës dhe industrisë kreative, dhe sot është shndërruar në një platformë të rëndësishme për bashkëpunim dhe frymëzim ndërkombëtar.

Edicioni i sivjetëm, që mbahet në Kino Armata, do të zhvillohet më 7 dhe 8 nëntor, me një program dinamik që përfshin panele, punëtori dhe performanca live. Pjesëmarrja në këto aktivitete është falas, dhe regjistrimi është i hapur në www.prishtinamusicweek.com.

Ky edicion vjen me fokus në qëndrueshmërinë, krijimin dhe vizionet konkrete që formësojnë rolin e Kosovës si një qendër gjithnjë e më e rëndësishme kulturore në rajon.

Programi i ngjarjeve – nga muzika tradicionale japoneze te legjendat e hip hop-it kosovar

Në prag të konferencës, më 6 nëntor, publiku do të ketë mundësi të përjetojë një udhëtim kulturor unik me eventin “Shamisen and Japanese Folk Music” në Kino Armata – një performancë që sjell tingujt tradicionalë japonezë në zemër të Prishtinës.

Të premten, më 7 nëntor, ndodh një prej momenteve më historike të javës:
NR, grupi legjendar i hip hop-it kosovar, rikthehet pas dekadash me të gjithë anëtarët origjinalë – BimBimma, Ergeni, Real1 dhe DJ Blunt – në një koncert ekskluziv në AMC Hall.

Ky ribashkim shënon një ngjarje të veçantë për muzikën shqiptare, pasi NR, që u formua në fund të viteve ’90, ishte ndër grupet e para që solli hip hop-in pas luftës në Kosovë. Me albumin e tyre historik Egjeli (2003), ata sollën një zë të ri për një brez të tërë artistësh dhe dëgjuesish.

Finalja e madhe: RAVE & Freddy K në AMC Hall – 8 nëntor

Këtë nëntor, RAVE Production dhe Prishtina Music Week bashkojnë forcat për të sjellë finalen e madhe të javës muzikore. Më 8 nëntor 2025, Freddy K, një prej figurave më të rëndësishme të skenës techno evropiane, do të performojë për herë të parë në Kosovë, në AMC Hall.

I njohur si një aktivist i vërtetë i underground-it që nga vitet ’90, Freddy K ka ndikuar fuqishëm në formësimin e kulturës elektronike evropiane, duke mbrojtur vinilin dhe duke ndërtuar platforma për talentet e reja.

Në Prishtinë, ai do të ndajë skenën me Paquita Gordon, Opium Hum dhe Toske, në një mbrëmje që pritet të zgjasë deri në orët e para të mëngjesit.

Ky event shënon mbylljen e edicionit të pestë të Prishtina Music Week, duke e përmbyllur një javë të mbushur me muzikë, energji dhe bashkim krijues.

Një javë që lidh kulturën, idetë dhe ritmet

Nga tingujt tradicionalë deri te techno e natës, nga panele profesionale te ribashkimi i ikonave, Prishtina Music Week 2025 po dëshmon se Kosova po e konsolidon vendin e saj si një pikë referimi në hartën muzikore të rajonit.

Java e Muzikës në Prishtina – nga 1 deri më 8 nëntor – është më shumë se një festival. Është një platformë që bashkon vizione, energji dhe komunitete që besojnë në fuqinë e muzikës për të transformuar.

Prishtina Music Conference 2025 sjell diskutime, panele dhe punëtori ku artistë dhe profesionistë ndajnë ide, vizione dhe pasion për industrinë muzikore. 🏙️ E premte shënon një rikthim historik me NR live, duke ndezur skenën me energji të papërsëritshme, ndërsa e shtunë kulmon me ritmet e fuqishme të natës elektronike me Freddy K, Paquita Gordon, Opium Hum dhe Toske – një fundjavë që duhet përjetuar me zë të lartë dhe me gjithë zemër!