Presidentja Osmani nderohet në Itali me Çmimin Bonifacio VIII, vlerësim për paqe dhe bashkëpunim ndërfetar

Presidentja e Republikës së Kosovës, Vjosa Osmani, është nderuar në Anagni – i njohur si qyteti i Papëve – me Çmimin Bonifacio VIII, i ndarë nga Akademia Bonifaciana. Ky çmim i është dhënë në vlerësim të angazhimit të saj institucional për paqen dhe kontributit të vazhdueshëm në forcimin e bashkëpunimit ndërkulturor dhe ndërfetar, raporton KosovaPress.

Ky vlerësim pasqyron misionin e Akademisë Bonifaciana, një institucion prestigjioz që promovon drejtësinë, dinjitetin njerëzor dhe paqen si vlera themelore të veprimtarisë së saj.

Çmimi Bonifacio VIII u është ndarë ndër vite personaliteteve të shquara botërore, përfshirë edhe Papa Gjon Palin II.

Me këtë rast, presidentja Osmani theksoi se ky vlerësim përforcon përkushtimin e saj ndaj vlerave universale, të cilat udhëheqin vizionin dhe veprimin institucional të Republikës së Kosovës në ndërtimin e paqes, dialogut dhe mirëkuptimit ndërmjet popujve.