Nga ideja e Teslës në realitet: energjia pa kabllo tashmë funksionon

Agjencia Amerikane e Projekteve të Avancuara të Mbrojtjes (DARPA) ka arritur një rekord të ri botëror në fushën e transmetimit pa tela të energjisë.

Në një test të zhvilluar në New Mexico, DARPA ka arritur të dërgojë mbi 800 watt energji në një marrës të vendosur 8.6 kilometra larg, duke përdorur rreze lazer.

Ky sukses shënon një përparim të madh në zhvillimin e teknologjisë së transferimit të energjisë pa kabllo (WPT) – një ide që i ka rrënjët në eksperimentet e Nikola Teslës më shumë se një shekull më parë.

Në testin e quajtur Persistent Optical Wireless Energy Relay (POWER), energjia u transmetua për 30 sekonda në distancën rekord. Për krahasim, rekordi i mëparshëm ishte 230 watt në 1.7 kilometra për 25 sekonda. “E kemi tejkaluar plotësisht çdo demonstrim të mëparshëm si në fuqi ashtu edhe në distancë,” deklaroi menaxheri i projektit, Paul Jaffe.

Sistemi funksionon duke dërguar një rreze lazer drejt një marrësi me pasqyrë parabolike, e cila përqendron dritën mbi qeliza diellore që e kthejnë në energji elektrike të përdorshme. Edhe pse efikasiteti i konvertimit ishte vetëm rreth 20%, testi dëshmoi se transmetimi i energjisë në distanca të tilla është i mundur, madje edhe nën kushte atmosferike të zakonshme.

Sipas DARPA-s, qëllimi afatgjatë i kësaj teknologjie është krijimi i një rrjeti energjie pa tela që mund të përdoret në zona të vështira për t’u arritur, si fushëbeteja apo rajone të prekura nga fatkeqësi natyrore, duke shmangur nevojën për karburant apo transport fizik të energjisë. Në të ardhmen, kjo teknologji mund të shërbejë edhe për drone dhe mjete pa pilot, duke u mundësuar atyre të qëndrojnë funksionalë për periudha shumë më të gjata.