New York Times rekomandon filmin shqiptar “Pikë Uji”

Gjatë ditëve të fundit, një lajm i gëzueshëm ka ardhur për kinematografinë shqiptare: filmi “Pikë Uji” (Waterdrop) me regji nga Robert Budina dhe me aktoren Gresa Pallaska në rolin kryesor, është përzgjedhur nga prestigjiozja The New York Times si pjesë e listës “Five International Movies to Stream Now”.

Ky vlerësim u publikua më 19 shtator 2025 nga kritikja e njohur e filmit, Devika Girish, e cila renditi veprën shqiptare përkrah katër filmave të tjerë ndërkombëtarë. Përfshirja e “Pikë Uji” në këtë listë përfaqëson një moment të rrallë dhe të çmuar, duke vendosur Shqipërinë në qendër të hartës së kinematografisë botërore.

Në artikull, filmi përshkruhet si një rrëfim i fuqishëm mbi atmosferën e zymtë të korrupsionit, i ndërtuar përmes historisë së Aida-s (Gresa Pallaska) dhe Ilir-it (Arben Bajraktaraj). Çifti jeton në një pallat modern mbi qytetin e Pogradecit, me pamje madhështore drejt Liqenit të Ohrit, kontrast i fortë mes bukurisë së natyrës dhe realitetit të errët që i rrethon.

The New York Times vlerëson qasjen regjisoriale të Robert Budinës, duke theksuar mënyrën se si ai përdor ngjyrat blu dhe gri, perspektiva të shtrembëruara dhe atmosferë të rëndë vizuale për të shpalosur tensionet e brendshme të personazheve dhe kalbëzimin e shoqërisë.

Ky sukses ndërkombëtar vjen si vazhdimësi e një serie reagimesh pozitive nga kritika botërore. Revista Variety e cilësoi filmin si një “dramë kaptivuese shqiptare”, ndërsa portali Cineuropa e përshkroi si një “akuzë të fuqishme ndaj sistemeve patriarkale dhunore”, duke nënvizuar se “mjafton një pikë për të thyer digën”.

“Pikë Uji” tashmë ka kaluar kufijtë e Shqipërisë dhe po shndërrohet në një ambasador të kulturës dhe kinemasë sonë në skenën globale, duke dëshmuar edhe njëherë potencialin e artit shqiptar për të prekur audienca ndërkombëtare.