Miauricio, macja që u bë “Inxhinier i Mbështetjes Emocionale” në zyrat e një kompanie meksikane

Një histori e pazakontë ka rrëmbyer zemrat e përdoruesve të rrjeteve sociale: Miauricio, një mace portokalli, është bërë figurë e dashur dhe zyrtare në kompaninë meksikane Geotest, e specializuar në inxhinieri gjeoteknike. Punonjësit e gjetën macen dhe vendosën ta mbajnë në ambientet e zyrës, ku shpejt u bë pjesë e pandarë e përditshmërisë, duke marrë pjesë në mbledhje, projekte dhe pushimet e kafes.

Prania e Miauricio-s ndikoi kaq shumë në ambientin e punës, sa kompania vendosi t’i japë një titull simbolik, por zyrtar: “Inxhinier i Mbështetjes Emocionale”. Madje, macja “nënshkroi” një kontratë dhe u pajis me kartë identifikimi të kompanisë, ku shfaqet me emër, rol dhe fotografi, i veshur si një drejtues i vërtetë.

Rasti i Miauricio-s nuk është thjesht një gjest simpatik për rrjete sociale, por përçon një mesazh të rëndësishëm: mirëqenia emocionale në vendin e punës ka vlerë të madhe. Në një kohë kur stresi dhe presioni profesional janë të pranishëm në shumë zyra, Geotest tregon se ndonjëherë “punonjësi” më i vlefshëm është ai që sjell buzëqeshje, qetësi dhe ngrohtësi.

Dhe duket se në këtë kompani meksikane, inxhinieri më i dashur nuk ka dy këmbë, por katër putra – dhe një zemër të madhe për të gjithë ekipin.