FFK pajis klubet e futbollit me defibrilatorë për sigurinë e lojtarëve

Federata e Futbollit e Kosovës (FFK), me ndihmën e programit UEFA HatTrick, ka nisur një projekt të rëndësishëm për të rritur sigurinë në fushat e futbollit.

Brenda këtij projekti, të gjitha klubet e Superligës, Ligës së Parë, Ligës së Dytë, si dhe klubet e femrave, janë pajisur me defibrilatorë modernë – pajisje që mund të shpëtojnë jetë në raste të ndalimit të papritur të zemrës apo emergjencave të tjera shëndetësore.

Në vitet e fundit, disa raste të rënda me lojtarë që kanë pësuar probleme shëndetësore gjatë ndeshjeve, kanë treguar sa të domosdoshme janë këto pajisje në çdo fushë. Përveç shpërndarjes së defibrilatorëve, FFK ka organizuar edhe trajnime praktike për mënyrën e përdorimit të tyre. Në këto trajnime, stafi mjekësor i Kombëtares A të Kosovës ka ndarë përvojat e fituara nga trajnimet e UEFA-s.

Presidenti i FFK-së, Agim Ademi, tha se ky projekt është një investim në jetë dhe siguri.

“Ky projekt tregon qartë që siguria dhe shëndeti i lojtarëve janë prioritet absolut për Federatën e Futbollit të Kosovës,” – u shpreh ai.

Ndërkohë, mjeku i Kombëtares A, Amir Vejseli, theksoi rëndësinë e këtyre pajisjeve në çdo aktivitet sportiv:

“Defibrilatori është një pajisje që mund të shpëtojë jetë dhe duhet të jetë e pranishme në çdo ndeshje apo stërvitje. Organizimi mjekësor është po aq i rëndësishëm sa ai sportiv.”

Me këtë hap, FFK synon që çdo lojtar, trajner dhe anëtar stafi të ketë kushte më të sigurta gjatë lojës dhe stërvitjes.

Ky projekt shihet edhe si një hap drejt profesionalizimit të futbollit kosovar, duke e afruar atë me standardet evropiane të kujdesit shëndetësor në sport.