Banka e Shqipërisë nxjerr në shitje monedhën e rrallë të 100-vjetorit: Vetëm 500 copë për publikun

Në Muzeun e Bankës së Shqipërisë është krijuar një atmosferë e veçantë këto ditë, pasi institucioni ka nxjerrë në shitje një thesar të rrallë: monedhën përkujtimore të 100-vjetorit të tij. Vetëm 500 copë janë prodhuar, duke e kthyer këtë monedhë në një objekt që koleksionistët e vërtetë nuk duan ta humbasin.

Erinda Çaushi nga sektori i Komunikimit të BSH-së rrëfen se ideja e monedhës ka qenë të ndërthurë artin me historinë monetare të vendit. Ajo tregon se projekti ka zgjatur plot tre vite, nga koncepti deri te stampimi final — një proces i kujdesshëm që kërkonte të përfaqësonte denjësisht shekullin e parë të Bankës së Shqipërisë.

E dizenjuar nga artistja Brikena Berdo, monedha prej argjendi mbart në njërën anë tre institucionet kryesore që kanë shënjuar periudhat kryesore të bankës. Në anën tjetër gjendet portreti i një djali me veshje popullore të Shqipërisë së Mesme, si në kartëmonedhën e vitit 1926, së bashku me figurën e Asdrenit, të huazuar nga prerja 10 000 lekëshe. Në pjesën anësore shkëlqen mbishkrimi “100 vjet BSH”, një detaj që e bën monedhën edhe më të çmuar.

Sipas BSH-së, kjo monedhë nuk është thjesht një objekt koleksioni, por një vepër arti që mbledh brenda vetes historinë, kulturën dhe rrugëtimin e një institucioni që ka shoqëruar zhvillimet ekonomike të vendit për një shekull të tërë. Monedha tashmë është e hapur për publikun dhe pritet të jetë një nga emetimet më të kërkuara të këtij jubileu.