Fondacioni Armani merr drejtimin e trashëgimisë së markës

Trashëgimia e Giorgio Armani-t, që përfshin të gjitha linjat e modës, restorantet dhe pasuritë e tjera të kompanisë, tashmë do të administrohet nga Fondacioni i themeluar nga vetë stilisti.

Ky mekanizëm për menaxhimin e aseteve dhe vazhdimësinë e perandorisë ishte menduar që në vitin 2016 dhe është ndërtuar nën udhëheqjen e Pantaleo Dell’Orco, bashkëpunëtorit më të afërt të Armani-t, si dhe Irving Bellotti, drejtues i Rothschild Italy.

Në kuadër të planit të ri, nipi i stilistit, Luca Camerana, pritet të marrë drejtimin dhe të trashëgojë vizionin e themeluesit, duke e çuar përpara frymën dhe filozofinë e markës.

Kjo qasje e re siguron që perandoria Armani të mbetet besnike ndaj identitetit dhe vlerave që e kanë karakterizuar prej dekadash, duke garantuar vazhdimësinë në fushën e modës, dizajnit dhe kulturës.

Fondacioni do të ketë përgjegjësinë të mbikëqyrë të gjitha aktivitetet e kompanisë, nga koleksionet e veshjeve e aksesorëve, tek parfumet, restorantet dhe projektet e tjera të lidhura me emrin Armani, duke ruajtur ndikimin e saj global dhe duke e përcjellë për gjeneratat e ardhshme.