“Themelohet Oda e Grave Shqiptare në Zvicër”

Komuniteti shqiptar në Zvicër është pasuruar së fundmi me një organizatë të re me mision të qartë shoqëror dhe kulturor. Është themeluar zyrtarisht Oda e Grave Shqiptare në Zvicër (ODGSH), një shoqatë e pavarur, jopolitike dhe jofitimprurëse, e cila synon fuqizimin, mbështetjen dhe integrimin e grave shqiptare në shoqërinë zvicerane.

Që nga themelimi i saj, ODGSH ka përcaktuar si mision kryesor promovimin e integrimit shoqëror, arsimor dhe profesional të grave, forcimin e rolit të tyre në familje dhe shoqëri, si dhe ruajtjen dhe zhvillimin e kulturës, gjuhës dhe identitetit shqiptar. Përmes aktiviteteve të strukturuara arsimore, këshillimore dhe kulturore, shoqata synon të krijojë hapësira zhvillimi dhe mbështetjeje për gratë shqiptare në Zvicër.

Një fokus i veçantë i veprimtarisë së Odës janë programet e mentorimit dhe ndërtimi i rrjeteve të solidaritetit, të cilat synojnë forcimin e bashkëpunimit dhe shkëmbimin e përvojave mes grave shqiptare nga fusha të ndryshme të jetës shoqërore dhe profesionale.

Ndër objektivat kryesore të ODGSH-së është edhe bashkëpunimi me institucione shtetërore dhe lokale, komuna, shkolla, organizata dhe partnerë të ndryshëm në Zvicër, me synimin për të rritur pjesëmarrjen shoqërore dhe qytetare të grave shqiptare, si dhe për të promovuar barazinë, gjithëpërfshirjen dhe integrimin aktiv në shoqërinë zvicerane.

Oda e Grave Shqiptare në Zvicër mbetet e hapur për të gjitha gratë, organizatat dhe individët që ndajnë të njëjtat vlera dhe që dëshirojnë të kontribuojnë në mënyrë aktive në ndërtimin e një shoqërie më të drejtë, më të barabartë dhe më gjithëpërfshirëse.