iPhone 17: Përdoruesit raportojnë ndryshim ngjyre te modeli Cosmic Orange

Pas debateve që shpërthyen rreth rezistencës ndaj gërvishtjeve të iPhone 17, tani një çështje tjetër ka tërhequr vëmendjen e përdoruesve: ndryshimi i ngjyrës te modelet iPhone 17 Pro dhe Pro Max, veçanërisht në variantet Cosmic Orange dhe Deep Blue.

Disa përdorues raportojnë se ngjyra portokalli e pajisjes së tyre ndryshon gradualisht në nuanca rozë ose rose gold pas një periudhe përdorimi. Ngjyra Cosmic Orange, e prezantuar për herë të parë me këtë gjeneratë, u vlerësua për pamjen e saj të veçantë dhe elegante. Megjithatë, në rrjetet sociale janë shpërndarë imazhe që tregojnë zbehjen ose ndryshimin e ngjyrës, kryesisht rreth kamerës dhe kornizës së pasme. Disa përdorues kanë krahasuar efektin me lodrat që ndryshojnë ngjyrë në varësi të temperaturës.

Një përdorues në Reddit, i njohur si “DakAttack316”, postoi një foto të telefonit të tij duke shkruar: “Doja një iPhone portokalli, jo rozë.” Të tjerë kanë sugjeruar se ndryshimi mund të ndodhë pas ekspozimit të gjatë ndaj diellit, megjithëse kjo hipotezë ende nuk është konfirmuar nga Apple.

Aktualisht, kompania nuk ka dhënë asnjë koment zyrtar, dhe në forumet e mbështetjes nuk janë raportuar raste të ngjashme, duke e bërë të paqartë nëse fenomeni është i përhapur apo i izoluar.

Ekspertët sugjerojnë se problemi mund të lidhet me procesin e anodizimit të aluminit ose me reaksionin e materialit ndaj dritës UV, por deri më tani nuk ka prova të mjaftueshme për të konfirmuar këtë. Megjithatë, fenomeni i ndryshimit të ngjyrës tek iPhone 17 Pro ka shkaktuar diskutime të gjera në komunitetin online dhe forumet teknologjike.